Kulturmuitojahki 2009

Norgga ráđđehus lea stuorradiggedieđáhusain ”Eallit kulturmuittuiguin” válljen 2009 kulturmuitojahkin. Kulturmuitojagi lágidemiin ráđđehus ja guovddáš ovttasbargoguoimmit háliidit movttiidahttit lagaš ja buori ovttasbargui eaktodáhtolaš, almmolaš ja priváhta organisašuvnnaid gaskkas. Kulturmuitojahki galgá sihke áigeguovdilastit ja čalmmustahttit kulturmuittuid šláddjivuođa, ja oažžut ovdan athe kulturmuitobarggus ja kulturgaskkusteamis lea iešalddis árvu.

Kulturmuitojagi 2009 váldofáddá lea juohkebeaivválaš kulturmuittut. Fáddá lea viiddis, sihke sosiálalaččat ja áiggi dáfus, ja fátmmasta sihke ávnnaslaš ja eahpeávnnaslaš kulturárbbi. Dáinna fáttáin mii háliidit áŋggirduhttit ollu olbmuid, báikkálaččat, regionálalaččat ja nationálalaččat ja sihke eaktodáhtolaš ja fidnolaš deaivvadansajiin.

Guovtti láhkai lea jurddašuvvon lahkonit fáttá. Ulbmilin goappašagaiguin lea heivehit kulturmuittuid stuorát oktavuhtii. Nubbi lahkonanvuohki lea veahkehit čalmmustahttit kulturárbbi ovddideami Norggas. Makkár kulturduvdosat ja kulturdeaivvadeamit leat vuođđun ja gos dat bohtet? Prošeavttaiguin ja doaimmaiguin Kulturmuitojahki 2009 háliida oažžut buoret áddejumi dain proseassain ja oahppat eanet daid proseassaid birra, mat leat hábmen daid kulturmuittuid mat leat min birrasis. Nubbi lahkonanvuohki fas lea kulturmuittuid duođašteapmi. Duođašteapmi geavahuvvo dás hui viidát – dat sáhttá ilbmat ollu iešguđet dásiin ja iešguđet vugiiguin. Dát vuolggaha sihke smávva, álkes duođaštanprošeavttaid ja stuorra ásahusaid viides duođaštanbargguid.

Kulturmuitojagis 2009 galget leat dakkár doaimmat go čájáhusat, kulturvádjolusat, muitočoaggin, skuvlaprošeavttat ja báikkálaš historjjálaš wikipedia. Neahttasiidu ovdanbuktá vahku kulturmuittu ja mánu artihkkala. Mii deattuhit ovttasbarggu báikkálaš, regionála, nationála ja riikkaidgaskasaš oassálastiiguin.

Birasgáhttendepartemeanta ja Kultur- ja girkodepartemeanta áŋgiruššet ovttas. Norgga kultursuodjalanlihtus lea váldoovddasvástádus Kulturmuitojagi plánemis, čađaheamis ja árvvoštallamis. Kultursuodjalanlihtus lea lagaš ovttasbargu Riikkaantikvárain, arkiiva-, girjerádjo ja museaguovddážiin, KS ja Norgga musealihtuin. Ovttas dát lea almmolaš ja eaktodáhtolaš áŋgiruššama nationála oktiiordnenjoavku.

Eanet dieđuid addá:

Kulturmuitojagi 2009 čállingoddi

Prošeaktajođiheaddji Sidsel Hindal

Norgga kultursuodjalanlihttu

Stortingsgaten 12, 0161 Oslo

E-poasta: sidsel.hindal@kulturvern.no / kulturminneaaret2009@kulturvern.no

Telefuvdna: +47 918 13 590